Білгір маман келді

Сәрсен Құранбек Мәдениет және спорт вице-министрі боп тағайындалды. Ақжолтай жаңалықты естіген ұлттық спортымыздың жанашырлары мен осы тақырыпты төңіректейтін тілші қауымның қуанғаны анық. Өйткені, Сәрсен отандық спортты жетік білетін, саланың өркендеуіне көп еңбек сіңірген білікті де білгір маман. Бесаспап ұйымдастырушы екенін Азиада ойындары, Олимпиада алауы шеруі кезінде көрсетті. “Қазақстан Барысы” жобасы арқылы Қазақ күресінің жер-жиһанға танылуына, ең бастысы, қалың бұқараның ұлттық ойынына бет бұруына үлес қосты. Білім мен тәжірибені шебер ұштастыра білген қайраткер азаматтың тағы бір ерлігі — ұмытылуға аз қалған Түркі жұртының төл өнері шөгенмен халқымызды қайта қауыштыруы.
Сәрсен Құранбек жаңа қызметінде, әсіресе, кейінгі кезде істі білетін жанашырлардың жоқтығынан тұралап қалған бұқаралық спорттың бойына қан жүгіртіп, салауатты қоғам қалыптастыруға серпін береді деген сенімдеміз.

Ендеше, іске сәт!

Срайыл Смайыл