Безбүйрек әке мүгедек ұлынан бас тартты

Қостанайда сал ауруына ұшыраған баланың әкесін ата-аналық құқығынан айырды. Бұл туралы Қостанай қалалық прокуратурасы бөлімінің прокуроры Эльмира Нұрқанованың мәлімдемесінен белгілі болды.

«Баланың анасы өз күйеуін әкелік құқынан айыруды сұрап шағым түсірген. Қазір кімдер ата-аналық құқынан айырылмай жатыр дейсіз деп ойлауыңыз мүмкін. Алайда бұл жағдайда сал ауруға шалдыққан баланың әкесі баладан өзі бас тартқан. 2005 жылы дүниеге келген бала туғанынан мүмкіндігі шектеулі жандар қатарында», — дейді Эльмира Нұрқанова.

Әкесі баласымен 2006 жылдан бері көріспеген. Материалдық көмек те көрсетпеген. Алимент құны 1 миллион теңгеден асып кеткен деп жазды NUR.KZ.

«Ең сорақысы, әкесі тіпті сот отырысына да келмеді. Ол тек әкелік құқынан айыру шешімімен толық келісетінін көрсетіп жазбаша хат жолдаған», — дейді прокурор.

Сот шешімі заңдық күшіне енген жоқ.