Бесінші қабаттан секіріп аман қалды

Жетісу облысы, Текелі қаласындағы көп қабатты үйдің бесінші қабатынан секірген 8 жастағы бала аман қалды. Пәтерде қараусыз қалған балақай полиэтилен пакетті парашют жасап терезеден секірген.

Оқыс оқиға 25 сәуірде сағат 12:20-да Текелі қаласында болды. Үйде ересектердің қарауынсыз қалған 2015 жылы туған бала бесінші қабаттың терезесінен парашют түрінде полиэтилен пакетін пайдаланып секіргені белгілі болды. Қазіргі уақытта баланың жағдайы тұрақты. Ол Талдықорған қаласының облыстық ауруханасына жатқызылды. «Белгілі болғандай, терезеден секірген бала ағашқа ілініп, сосын жерге құлаған. Аман қалуына ағаштың да септігі тиген деп ойлаймыз. Жетісу облысы ТЖД азаматтардан балаларды ересектердің қарауынсыз қалдырмауға, сондай-ақ балаларды терезені ашудан арнайы қорғаныс құрылғыларын орнатуға шақырады»,- деп хабарлады Жетісу облысы ТЖД баспасөз қызметі.

JQ-Aqparat