Бес адамды қағып кеткен жүргізуші әйел ұсталды

Таразда бес адамды қағып кеткен жүргізуші әйел ұсталды, – деп хабарлайды Tengrinews.kz тілшісі Жамбыл облысының ІІД баспасөз қызметіне сілтеме жасап.

Баспасөз қызметіндегілердің мәліметінше, күдікті уақытша ұстау изоляторына қамалды. Қажетті сараптамалар тағайындалды. «Жол-көлік оқиғасына байланысты облыстық ІІБ бас басқармасы ҚР Қылмыстық кодексінің 345-бабының 3-бөлігі бойынша («Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы») қылмыстық іс қозғады», –  деп хабарлады облыстық ІІД өкілдері.

Еске салайық, оқиға 15 тамызда шамамен сағат 19.20-да болған. Toyota Corolla автокөлігін мінген әйел Аппаев көшесінің бойымен Абай көшесіне қарай жүріп бара жатқан. Бір мезетте ол тізгінді игере алмай қалып, 20 жастағы тұрғынды қағып, артынша жолдың шетінде тұрған төрт адамды қаққан.

kaz.tengrinews.kz