Баянауыл ауданында республикалық тас жолды су шайды (видео)

Баянауыл ауданында таулы аймақтардан аққан қар суы республикалық маңыздағы жолдың бір бөлігін шайып кетті.

Облыстық төтенше жағдайлар департаменті баспасөз қызметінің мәліметінше, таңертеңгі жағдай бойынша Бірлік ауылдық округіне қарасты Ақмектеп ауылының маңындағы «Ульяновский-Керней-Қалкаман» жолының 105-ші шақырымын су басқан.

«Қар суы жолдың үстімен өткен. Тереңдігі – 5 см, ені 60 метрге жетті. Қазіргі уақытта жол қозғалысы ашық, елді мекендерге қауіп жоқ», — дейді ведомствоның баспасөз қызметінің маманы Марал Сағынаева.

Қазіргі уақытта оқиға орнында құрамында алты маман мен үш арнайы техника бар жол-құрылыс компаниясының мамандары кезекшілік атқарып жатыр.

Бүгінде куәгерлер әлеуметтік желілерге жолдың шайылып кетуі туралы видеолар жариялап жатыр. Жолда қиындық көрген азаматтар өзгелерге сапарға шығудан бас тартуға кеңес беруде.

Еске сала кетсек, бұған дейін дәл осы жол учаскесі су астында қалған. Қызыл су жолдың 30 метрін шайып кеткен болатын. Жол қозғалысы қиындап, қалпына келтіру жұмыстары 1,5 тәулік бойы жүргізілді.

Жаңажол ауылы мен Ескелді шатқалы арасындағы жолдағы су жарты шақырымға жайылып, көлік қозғалысын қиындатқан. Қызыл судың тереңдігі 30 сантимерге жеткен. Қазіргі таңда бұл учаскеде қозғалысқа шектеу қойылды. Бүгінде қалпына келтіру жұмыстары аяқталды.

«Бұл жол арқылы көлік көп жүре қоймайды. Қарым-қатынас үзілген емес. Елді мекендерге төніп тұрған қауіп жоқ. Алдағы уақытта жол учаскесін жөндеу бойынша жоба жүзеге асырылады», — деп хабарлаған болатын аудан әкімі Оразгелді Қайыргелдинов.