Банкрот болмаса, кредит кешірілмейді

Егер жеке тұлға банкрот болмаса, оның несиесі кешірілмейді. Бұл туралы Премьер-Министрдің орынбасары Тамара Дүйсенова хабарлады. Ол бүгін Үкімет отырысынан кейін өткізілген баспасөз мәслихатында журналистің осы мәселеге қатысты сауалына жауап берді.
Вице-Премьер бұған дейін тұрғындардың қарызы не үшін кешірілгенін түсіндіре келе, «Есіңізде болса, жеке тұлғаларды банкрот деп тану туралы заңнамалық негіз болмағандықтан халықтың бір бөлігінің несиесі кешірілген болатын. Қазір ондай заңнамалық негіз бар. Соның аясында 6 мыңнан астам адам банкроттық жариялау мүмкіндігін алғанын бүгін айттық. Олар банкрот деп танылды. Яғни, олардың мәселесі шешілді» деді.
Бұл бағытта жұмыс жалғаса беретінін, атқарылар шаруаның заңнама аясында, бекітілген тәртіп негізінде жүретінін мәлімдеген Т. Дүйсенова «Банкроттықтан бөлек несиені кешіру процедурасы болмайды» деді.

JQ-Aqparat