Банкрот болғысы келетіндер көп

Қаржы вице-министрі Ержан Біржанов жеке адамдардың банкроттығы рәсімі туралы айтты.

Е. Біржанов Сенатта тілшілер сұрағына: «Биылғы 3 наурыздағы «Банкроттық туралы» заң аясында тиісті жұмыстар іске асырылып жатыр. Осы күннен бастап өтінімдерді қабылдай бастадық. Заңға сәйкес, тексеру жүргізуге жарты жыл уақыт қарастырылған. Бұл тұрғыда біз наурызда бірден өтінімді қабылдап, банкрот деп жариялай алмаймыз. Дәл қазір жартыжылдық мерзім өтті. Енді банкрот деп жариялау процедурасы жүріп жатыр. Алғашқы күндері адамдардан түскен 370-тен аса өтінімді қарастырып, оларды банкрот деп жарияладық», — деп жауап берді.

Оның айтуынша, күн сайын банкроттардың тізіміне 100-200 адам қосылып отырады. Соттан тыс банкроттық рәсіміне 65 мың Қазақстан азаматы өтінім берген.

«1 қыркүйектегі жағдай бойынша 10 мың адам банкрот деп жарияланауы мүмкін, бұл адамдар біртіндеп тізімге қосылып отырады. Өтінім күн сайын түсіп жатыр. Тізім толықтырылады. Осы 10 мың адамның шамамен 400-ге жуығын банкрот деп таныдық. Күн сайын банкрот тізіміне 100-150 адам қосылады», — деді вице-министр.

JQ-Aqparat