Балқашта әкімдікке «мина қойған» 39 жастағы әйел ұсталды

Қарағанды облысының Балқаш қаласында қалалық әкімдікке бомба қойылғаны туралы жалған хабарлама беруге күдікті 39 жастағы әйел ұсталды. Бұл туралы облыстық ІІД баспасөз қызметінің жетекшісі Бақытжан Құдияров хабарлады.

«Балқаш әкімдігіне жарылғыш құрылғы қойылғаны туралы жалған хабарлама бойынша жедел-іздестіру шараларының барысында экстремизммен күрес бөлімінің қызметкерлері күдіктіні анықтап, ұстады. Ол 39 жастағы қала тұрғыны болып шықты», –  дедің Б.Құдияров.

Оның айтуынша, ұсталған әйел мойындау жауабын берген.

«Бұл факті ҚР ҚК 273-бабы бойынша (Лаңкестік актісі туралы көрінеу жалған хабар беру) соталды тергеулерінің бірыңғай тізіліміне тіркелді. Күдіктіге қатысты бұлтартпау шарасы таңдалуда», –  деп қосты облыстық ІІД баспасөз қызметінің жетекшісі.

Бұдан бұрын полицияның учаскелік инспекторының телефонына түскен Балқаш әкімдігі мен ХҚКО-ға бомба қойылғаны туралы СМС-хабарламаға байланысты іздестіру шаралары жүргізілгені хабарланған болатын.

ҚазАқпарат