Балқашта әкімдікке бомба «қойған» әйел ұсталды

Балқашта «102» нөміріне хабарласқан әйел Халыққа қызмет көрсету орталығы мен әкімдік ғимараттарына жарылғыш қойылғанын айтқан. Бұл туралы BNews.kz тілшісіне Қарағанды облысы ІІД баспасөз қызметінің жетекшісі Бақытжан Құдияров мәлімдеді.

«102 нөміріне бір әйел қоңырау шалып, әкімдік пен Халыққа қызмет көрсету орталығына жарылғыш қойылғанын хабарлады. Шұғыл қызметтер дереу оқиға орнына аттанды. Ғимараттардан 100-ге тарта адам эвакуацияланды. Алайда ештеңе табылған жоқ», — дейді Б.Құдияров.

Жалған ақпар таратты деген күдікпен экстремизммен күрес бөлімінің қызметкерлері 39 жастағы әйелді ұстады. Күдікті кінәсін мойындап отыр.
«Аталған фактіге қатысты материал ҚР ҚК 273-бабы «Терроризм актiсi туралы көрiнеу жалған ақпарат тарату» бойынша сотқа дейінгі тергеудің бірыңғай реестріне тіркелді. Бұл баптың санкциясы алты жылға дейін бас бостандығынан айыру жазасын қарастырады. Қазір әйел уақытша ұстау абақтысында жатыр», — деп мәлімдеді полициядан.

bnews.kz