Азия ойындарында — үшінші алтын!

Туризм және спорт министрлігі хабарлағандай, «Скит» жаттығуының финалында қазақстандықтар Кувейттен келген қарсыластарынан басым түсті. Қорытынды есеп – 40:35.

Осылайша Азия ойындарында еліміздің ұлттық құрамасы үшінші алтын медальді қанжығаға салды.

Кеше еліміздің әйелдер командасы  (Әсем Орынбай, Зоя Кравченко, Ольга Панарина) «скит» жаттығуында алтын медаль жеңіп алып, Азия ойындарының рекордын орнатқан болатын. Ал жекелей сында Әсем Орынбай қола жүлдеге ие болды.

Туризм және спорт министрі Ермек  Маржықпаев спортшыларды жеңісімен құттықтап: «Біздің мергендер тағы да керемет нәтиже көрсетті! Спортшыларды, жанкүйерлерді және команданың жаттықтырушылар штабын осы жеңіспен құттықтаймын. Бүкіл ел мергендерімізбен мақтанады. Бұл жеңіс мыңдаған қазақстандық жеткіншектерді осы спорт түрімен айналысуға шабыттандыратынына сенімдімін», — деді.

JQ-Aqparat