Қазақ мектебі жоқ аудан

Ақтөбе облысының Қарғалы ауданында бірде бір қазақ мектебі жоқ. Ауданда 17 мыңнан астам адам тұрады. Олардың 32 пайызы өзге ұлт өкілі. Қарғалыдағы 17 мектептің үшеуі орыс тілінде, өзгесі аралас тілде білім береді.

inform.kz сайтының хабарлауынша Ақтөбенің Ресеймен шекарас аудандарында қазақ тілінің жағдайы мәз емес. Тұрғындарының 32 пайызы өзге ұлт өкілі саналатын Қарғалы ауданында әлі күнге дейін бірде бір қазақ мектебі жоқ.

«Аудандағы үш мектеп орыс тілінде, өзгесі аралас. Қарғалының орталығы Бадамша ауылында бір мектеп орыс тілінде, біреуі аралас болып тұр. Аралас мектеп төрт жылдан кейін түгелдей қазақ тіліне ауыстырылады. Оған дейін бұрын мектепке қабылданған балалардың бәрі бітіріп шығады. Бала саны аз болған соң аудан орталығындағы аралас тілде сабақ беретін бір мектептің өзін толтыра алмай отырмыз»,- деді аудан әкімі Рахат Сыдықов.

Оның айтуынша, алдағы 2-3 жылда аудан мектептерінің 60 пайызы қазақ тілінде білім береді деген жоспар бар.