Атырауда 20 тоннаға жуық прекурсор тәркіленді

Атыраудағы мұнай өңдеу мекемелерінен 20 тоннаға жуық прекурсор тәркіленді. Облыстық полиция департаментінің баспасөз қызметі хабарлағандай, «Дәрмек» жедел-профилактикалық іс-шарасы кезінде мұнай өңдеу мекемелерінің зертханалары тексерілген.

Департаменттің баспасөз қызметінің хабарламасында: «Аталған іс-шараны өткізудегі мақсат – есірткі құралдарының, психотроптық заттар мен прекурсорлардың заңды айналымы саласындағы құқық бұзушылықтарды анықтау, бақылаудағы заттардың заңсыз саудасының жолын кесу. Есірткі қылмысына қарсы іс-қимыл басқармасының қызметкелері Атырау қаласындағы ірі мұнай өңдеу мекемелерінің лабораторияларына тексеру жұмыстарын жүргізді.

Тексеру нәтижесінде Әкімшілік құқық бұзушылық туралы кодекс талабын бұзған бірнеше дерек анықталды. Мәселен, 464-бабы (Қазақстан Республикасының заңнамасында белгіленген лицензиялау нормаларын бұзу, оның iшiнде лицензияланатын қызмет түрлерiне қойылатын бiлiктiлiк талаптарына сәйкес келмеу) 2 мәрте, 426-бабы (Фармацевтикалық қызметтің және дәрілік заттар мен медициналық бұйымдардың айналысы саласының қағидаларын бұзу) 1 және 427-бабы (Есірткі, психотроптық заттар, прекурсорлар айналымы саласындағы объектілер мен үй-жайлардың техникалық нығайтылу талаптарын бұзу) 2 рет бұзылған. Сондай-ақ Атырау қаласындағы ірі мұнай өңдеу мекемелерінен 20 тоннаға жуық прекурсор тәркіленді. Осыған байланысты құжаттар жинақталып, сараптама тағайындалды», — деп жазылған.

JQ-Aqparat