Астанадағы су мәселесі: құзырлы министрлік нақты шаралар қабылдауы тиіс

Бүгін Президент Қасым-Жомарт Тоқаев еліміздің бас қаласын дамыту мәселелері жөнінде кеңес өткізді. Алда атқарылатын жұмыстардың негізгі бағыттарына тоқталған Мемлекет басшысы ең алдымен қаланы сумен қамтамасыз ету өте маңызды міндет екенін атап көрсетті.

«Жаздың басында су тапшылығы қатты сезілді. Бұған тұрғындар наразылық білдіргенін білесіздер. Тіпті, жолдарды бөгеп, митингке шықты. Бұл – елорда өмірінде болып жатқан келеңсіз оқиғалар.
Ашығын айтсақ, қаланың инженерлік инфрақұрылымын дамытуға жауапты адамдар жұмысын адал атқармаған. Бұл – нағыз салғырттық, соның салдарынан осындай күрделі ахуал қалыптасты. Мұны тіпті жұмысқа селқос қарау емес, қасақана зиян келтіру деуге болады. Себебі, су, жылу, жарық – күнделікті тұрмыстағы аса маңызды қажеттіліктер. Бұл салада қателікке мүлдем жол беруге болмайды. Сондықтан кінәлі адамдар тиісті жазасын алуы керек», — деді Президент.

Елордада жыл өткен сайын тұрғын саны көбейіп, жаңа нысандар пайдалануға беріліп жатқанда су қоймасының қуаты алдағы бір-екі жылда сарқылуы да мүмкін. «Бұған қоса, су қоймасы лайланып, ластанып жатыр. Мұны құзырлы министрлік білуге тиіс. Қойманың түбін тазалап, оны тереңдету керек. Астана су қоймасының бөгетін толық тексеріп, нығайту қажет. Оған Сәтбаев каналынан судың тұрақты келіп тұруын қамтамасыз еткен жөн. Осы шараларды дереу қолға алу керек», — деген Президент қойманың техникалық жағдайын шұғыл ретке келтіру жөнінде тапсырма берді.

«Бұған дейін экология министрлігіне қаланы сумен қамтамасыз ету үшін кешенді жұмыс жасау тапсырылды. Бірақ әлі күнге дейін нақты нәтиже жоқ. Тіпті осы мәселені шешуге қатысты тиімді ұсыныстар да жоқ. Тағы да қайталап айтамын: құзырлы министрлік нақты шаралар қабылдауға тиіс», — деді Қасым-Жомарт Тоқаев.

JQ-Aqparat