Астанадағы «Qala Qyzmet» айына 20 мың адамға қызмет көрсетеді

Жыл басынан «Qala Qyzmet» арқылы елордада 90 мыңнан астам қызмет көрсетілді. Бұл туралы Астана қалалық мониторинг және жедел әрекет ету орталығының басшысы Асқар Тақсымов айтты.

«2019 жылдың жарты жылдығында 3 701 қызмет, 2020 жылы – 69 560, 2021 жылы – 148 586, 2022 жылы 170 мыңнан астам қызмет, 2023 жылы 90 мыңнан астам қызмет көрсетілді. Бүгінде біздің орталық жеке және заңды тұлғаларға түрлі ұйымдар бойынша 146 қызмет ұсынады. Сондай-ақ аудан әкімдіктеріндегі «Qala Qyzmet» фронт-кеңселеріне айына 2000-2500 адам келеді. Портал айына 17 000 — 20 000 адамға қызмет көрсетеді», — деді Асқар Тақсымов.

Биылдан бастап халыққа коммуналдық қызмет көрсету саласындағы функцияларды оңтайландыру мақсатында «iKOMEK» орталығы мен «Qala Qyzmet» жобасы біріктірілді.

Айта кетейік, «Qala Qyzmet» — Астана тұрғындарының әкімдікпен және коммуналдық қызметтер саласындағы мекемелермен өзара іс-қимылын үйлестіретін жоба. Ол арқылы тұрғындар уақытылы шығарылмаған қоқыс, су, жылу, электр энергиясы және туындаған өзге де мәселелер бойынша шағым жолдай алады.

JQ-Aqparat