Астанада оқушы қыздарға қырындаған мұғалімге қылмыстық іс қозғалды

03 қазан 2024, 10:50

Әлеуметтік желіде астаналық ұстаздың оқушы қыздарға қырындап, мазасын алып жүргені туралы видео тарап, дау шықты. Істің мән-жайына қалалық білім басқармасы жауап берді деп жазды kaz.inform.kz.

«Мұғалім 2024 жылғы 2 қыркүйектен бері сынақ мерзімінде жұмыс істеді. Мектепішілік тәртіп комиссиясының шешімімен педагог 2024 жылғы 30 қыркүйекте жұмыстан босатылды», — дейді басқарманың баспасөз қызметі.

Белгілі болғандай ұстазды ҚР Еңбек кодексінің 52 бабы, 14 тармағы негізінде (тәрбиелеу функцияларын атқаратын жұмыскер осы жұмысын жалғастырумен сыйыспайтын, моральға қайшы қылықтар жасаған) жұмыстан босатқан.
Ата-аналар шу шығарғаннан кейін жұмыстан қуылған мұғалімнің үстінен қылмыстық іс қозғалды.
«Аталған факті бойынша қылмыстық іс тіркелді, тергеу амалдары жүріп жатыр. Қылмыстық-процестік кодекстің 201-бабына сәйкес өзге де ақпарат таратуға жатпайды», — деп растады елорданың полиция департаменті.

JQ-Aqparat