Астанада 26 мың оқушының орын тапшылығы шешіледі

Бас қаланың мектептерінде 26 мыңнан астам орын тапшылығы бар. Осы мәселені шешу үшін 11 мектеп салынып жатыр.

Астана қалалық білім басқармасының басшысы Қасымхан Сенғазыев осылай дейді. «Қазіргі таңда мектептерде 26 454 орын тапшылығы бар. Бүгінде орын тапшылығын жою мақсатында елордада 15 700 орынға арналған 11 мектептің құрылысы жүріп жатыр», — деді Қ. Сенғазыев Астана коммуникациялар орталығында өткен брифингте.
Сонымен қатар, Президент тапсырмасы бойынша «Жайлы мектеп» ұлттық жобасы аясында алдағы екі жылда 24 ірі мектеп ашылады.

Бұл мектептерде 90 мыңға жуық оқушы екі ауысымда білім ала алады.Алдан-ала көрсеткіш бойынша биылғы жаңа оқу жылында бас қаланың мектептеріне 255 мыңға жуық оқушы барады. Ал бірінші сыныпқа 27 мыңнан астам бала қабылданады.

JQ-Aqparat