Қаржы «пирамидасы» жабылмайды екен

Кеше Қарағандының Майқұдық ауданында біраз уақыттан бері жұмыс істеп тұрған «Оптовка» қаржы компаниясы жабылып қалғандығын  жергілікті тұрғындар хабарлаған болатын. Бүгін осы мәселенің мән-жайын анықтау үшін қаржы компаниясына хабарластық.

Нүркен Әбдіров даңғылы бойында орналасқан бөлімшенің жабылып қалғандығы белгілі болды. «Оптовка» қаржы компаниясының қызметкерлеріне телефон арқылы хабарласқанымызда, өзін «Оптовка» қаржы компаниясының қызметкерімін деп таныстырған азамат «бізде тексеру жұмыстары жүргізіліп жатыр, бүгін не ертең ашыламыз» деп сендірді.  «Қаржы пирамидасына» ақшаларын салып, еселеп, табысқа кенелеміз деп дәмеленген қарағандылықтар «Оптовка» кеңселерінің есігін кешеден бері күзетіп жүр.

«Кешеден бері кеңсенің есігін торыуылдап жүрміз. Халық арасында «Оптовка» жабылған жоқ, тек тексеріс жүріп жатыр деген ақпарат тарады. Енді осыдан үміт күтіп отырмын. Салған ақшамызды қайтарып алсақ болды, үстемесінің керегі жоқ», — деді редакциямызға хабарласқан қарағандылық тұрғын.

Бұған дейін, Қарағанды қаласында «қаржы пирамидасы» негізінде жұмыс істейтін «Оптовка» қаржы компаниясы жайында жазған болатынбыз.

Baq.kz