Арман қаладан – базар қалаға

Ақындар мен әншілер «Арман қала» деп әнге қосқан Алматы бүгінде алып базарға айналды. Теміржол вокзалы да, әуежай да базардың бір түрі болып тұр. Бұл туралы басқа емес, қаланың әкімі Бауыржан Байбектің өзі айтады.

Ол тұрғындарға есеп беруге арналған жиында «Біз бәрін базарға айналдырып жатырмыз. «Жібек жолы» қандай әдемі көше. Не болса, соны салып, күл-қоқысқа толтырып тастадық» -деді. Әкім айтуынша, туристер Алматыны «жағымсыз қала» деп айтады екен. Олардың бұлай деуіне қаптаған базар мен жәпірейген дүкендер, әр жерді жауып тастаған сұрқынсыз дуал негіз болып тұр екен. Бір қызығы, былтырғы есеп беруден кейін арада өткен бір жыл бойы қаланың ажарын қашырған қанша базардың жабылып, неше дуалдың құлатылғаны жөнінде айтылмады.