ӘМСҚ медициналық мекемелерге бақылауды күшейтеді

Әлеуметтік медициналық сақтандыру қоры (ӘМСҚ) МӘМС және ТМККК шеңберінде қызмет көрсететін медицина ұйымдарының қызметін бақылауды күшейту бойынша бірқатар шара қабылдады, деп хабарлайды jasqazaq.kz.

Жоғарғы аудиторлық палата баспасөз қызметінің мәліметінше, ӘМСҚ медициналық қызметтердің сапасына жоспардан тыс мониторинг жүргізді. Тексеру кезінде МӘМС және ТМККК жүйесіне қатысатын денсаулық сақтау субъектілерінің өндірістік базалары тексеріліп, олардың рұқсат беру құжаттарына, шарт талаптарына, стандарттар мен нормативтерге сәйкестігі бағаланды.

Соның нәтижесінде тексерілген 1,4 мың медицина ұйымының 238-інде түрлі заң бұзушылықтар анықталды. Олардың ішінде: рұқсат беру құжаттарының болмауы, бір өндірістік базада бірнеше клиниканың орналасуы, медицина қызметкерлерінің жарамды сертификаттарының болмауы және т.б. бар.
61 денсаулық сақтау мекемесіне айыппұл салынды.

10 медицина ұйымымен шартты бұзу процесі басталды.

Сондай-ақ анықталған заң бұзушылықтар бойынша денсаулық сақтау министрлігінің Медициналық және фармацевтикалық бақылау комитетінің аумақтық департаменттеріне 116 хабарлама жіберілді.

ӘМСҚ осындай тексерулерді жүргізу және деректерді тиісті органдарға беру бойынша бірыңғай алгоритм әзірледі.

JQ-Aqparat

Фото: Rawpixel