Аманжан Жамалов, Мәжіліс депутаты:

«Мемлекеттік қорғау бағдарламасы мен субсидияға қарамастан, бизнесті несиелеу ең төменгі деңгейге – 8 трлн теңгеге кеміді. Бұл – ЖІӨ-нің 10 пайызынан да аз. Базалық мөлшерлеме 14,5 пайызға жетті. Бизнес мұндай мөлшерлемемен несиені төлей алмайды. Ұлттық банк инфляцияға сілтейді. Инфляция – 16 пайыз, азық-түлік бағасының қымбаттауы 21 пайыздан асты. Баға өсуінің негізгі себебі – импорт тауарлардың қымбаттауы. Инфляцияға теңгенің рубльге шаққандағы бағамы тікелей әсер етуде. Жыл басынан бері рубль бағамы 40 пайызға нығайды. Бірақ рубльдің нығаюы нарықтық сипатта емес екенін Ұлттық банк ескермей отыр.

Мемлекет басшысы Ұлттық банкке икемді де ұтқыр болуға кеңес берді. Сондықтан мен Премьер-Министрдің рубль мен теңге арасындағы тікелей айырбасты қалыптастыру туралы ұсынысын құптаймын. Тарихи және экономикалық паритетті есепке алғанда, теңгенің рубльге шаққандағы бағамы 5-6 теңгеден аспауы керек».