Алматыда жер сілкінді. Тұрғындар далада жүр

Алматыда жер сілкінісі қатты сезілгеннен кейін тұрғындар дүрлігіп, далаға шығып кетті.

Алматыда жер сілкінісі екі рет сезілді. Бүкіл қалада дүрбелең басталды.
Төтенше жағдайлар министрлігіне қарасты «СТӘК» ЖШС-ның сейсмикалық стансалар желісі Алматы уақытымен 23 қаңтар күні 00 сағат 09 минутта жер сілкінісін тіркеді. Кейбір мәліметтерге қарағанда жерасты дүмпуі Алматыдан оңтүстік-шығысқа қарай 264 шақырым жерде, Қырғызстан мен Қытай шекарасы аумағында болды.
Энергетикалық санаты – 15.1. MPV тербелісі – 6.7. Тереңдігі – 65 км.
Жер сілкінісі Алматыда 5 балл деңгейінде (MSK-64 шкаласы бойынша) сезілді.
Алматы қаласы Төтенше жағдайлар департаментінің мәліметінше, өзара іс-қимыл алгоритмі бойынша тиісті мемлекеттік органдарға хабар берілді. Тіршілікті қамтамасыз ету объектілерінің жұмысына мониторинг жүргізіліп жатыр.
Тұрғындар қатты дүрлігіп кетті. Тіпті көліктеріне мініп, қаладан шығып жатқандар бар.
Журналист Диас Нұрақын Facebook-те: «Алматыда дүрбелең басталды. Елдің бәрі бір жаққа кетіп жатыр. Май құю бекеттерінде иін тірескен» деп жазды.
Алматы ТЖД басшысы Нұрлан Атығаев тұрғындарды сабырға шақырған бейнежазба жариялады. «Арнайы құлақтандыруға дейін үйден шығып, қауіпсіз жерде жүріңдер», — деді ол.

JQ-Aqparat