Саясат Нұрбек: Алматыда жанжал шығарған 6 үндістандық студент депортацияланады

Бүгін Үкімет отырысынан кейінгі брифингте ғылым және жоғары білім министрі Саясат Нұрбек Алматыда төбелес шығарған үндістандық студенттерге қатысты түсініктеме берді.

Министрдің айтуынша, жанжалға үндістандық студенттер ғана қатысқан. Осы іске қатысты Алматы полиция департаменті тергеу жүргізіп жатқан көрінеді.

Саясат Нұрбек: «Тергеу нәтижесін күтеміз. Үндістан елшілігімен тікелей байланыстамын, елшімен де сөйлестім. Олармен бірлесіп, төбелеске қатысқан студенттерді депортациялау туралы шешім қабылдадық. Бұл біздің ішкі позициямыз. Жақында Президентіміз «Ана тілі» газетіне сұхбат берді. Кез келген шетелден келген азаматтар өз елінде қалай заң сақтаса, Қазақстанда да солай қатаң заң сақтауға міндетті. Сондықтан тергеу шешімі қандай болса да, біз Үндістан елшілігімен бірлесіп, 6 студентті депортациялаймыз» — деді.

Еске салсақ, жаңа жылды мерекелеу кезінде Алматыдағы кафенің бірінде шетелдік студенттердің бір-бірімен төбелескені туралы ақпарат шыққан болатын.

JQ-Aqparat

Сурет: бейнежазбадан кадр