Алматыда қоныс аудару қоры құрылады

Осы жылдың соңына дейін Алматыда қоныс аудару қоры құрылады. Жалпы қоныс аудару қоры деген не? Түркісіб ауданының тұрғындарымен жүздесуде қала әкімі Ерболат Досаев тарқатып айтты. «Алматыда тұрғын үй қорын жаңартып, жаңғыртудың жаңа бағдарламасы әзірленіп жатыр. Былтыр мәслихат депутаттары қоныс аудару қорын құруға қатысты ойымды қолдаған еді. Қор осы жылдың үшінші тоқсанында өз жұмысын бастайды. Біз алдымен бюджет есебінен баспана сатып аламыз, сол жерге бұзылатын үйлердің тұрғындарын көшіреміз. Тек содан кейін ғана апатты үйлер сүріледі. Осы шаралардың барлығы адамдардың жайлы өмір сүруі үшін жасалады. Сонымен қатар Алматы әлеуметтік-кәсіпкерлік корпорациясы арқылы жеке инвестор жүзеге асыратын жобаларға қаржы бөлінді»,- деді Е.Досаев.
Шаһар басшысы реновация бағдарламасы уақытша тоқтатылғанын жеткізді. «Жуырда Үкімет Алматы қаласының 2040 жылға дейінгі Бас жоспарын бекіттеді деп үміттенемін. Қазіргі уақытта тиімді бағдарлама әзірлеу үшін реновация бағдарламасын уақытша тоқтаттым. Жаңартылған нұсқадағы жоба жалпыхалықтық жария талқылауға ұсынылады», — деді қала әкімі.

JQ-Aqparat