Алматыда астыртын арақ-шарап жасайтындар бар

Оңай олжаны көздегендер Алғабас елді мекеніндегі жер үйлердің бірінде қымбат спирттік ішімдіктерді қолдан жасаған.

ktk.kz хабарлағандай, заңсыз кәсіптің көзін тапқандарды Алматы облыстық экономикалық қылмысқа қарсы күрес басқармасының мамандары анықтапты. Алдымен олар Іле ауданында дайын өнімдер тиелген жүк көлігін ұстаған. Ішінен 60 жәшік коньяк тәркіленді. Кейін бұл заңсыз өнімдердің барлығы Алматыдағы астыртын цехта дайындалғаны анықталған. Ол жерді тінту барысында 500 шөлмек дайын арақ-шарап, жүздеген литр спирт, жалған акциздік маркалар мен арнайы арақ құюға арналған құрылғы тәркіленді.

Кәкімбек Көпжасаров, Алматы облыстық мемлекеттік кіріс департаментінің бөлім бастығы:

-Цех 1-1,5 жылдай уақыт жұмыс істеген. Арақтарды Қарасай, Талғар, Іле аудандарындағы сауда орындарына өткізген.