Алматыда 1116 ғимарат тектоникалық жарыққа салынған

Алматы қаласы 10 балдық жер сілкінісі болуы ықтимал аймақ саналады. Алматы қаласының кезектен тыс сессиясында шаһар әкімінің орынбасары Асқар Әмрин осылай деді.

Әкімнің орынбасары Алматыда жыл сайын 300-ге жуық жерасты дүмпулері болатынын осы жыл басынан бері 44 жер сілкінісі тіркелгенін айтты. Оның үшеуі қала тұрғындарына сезілді. Мегаполисте 1116 ғимарат тектоникалық жарықта орналасқан. Оның 754-і сейсмикалық төзімді, 362- сі сейсмикалық төзімді емес.

Тектоникалық процестердің белсенділігі ғимараттардың жер сілкінісіне төзімділік нормаларына әсер ететін ескерткен А.Әмрин қауіпсіздікті күшейту жұмыстары жүргізілетінін айтты.
«Осыған байланысты 15 мың азаматтық және қоғамдық ғимараттарды, 1600-ден астам көпқабатты тұрғын үйлерді паспорттауға жергілікті бюджеттен 2 млрд теңге бөлу жоспарланып отыр», — деді Асқар Әмрин Алматы қаласы мәслихатының кезектен тыс VIII шақырылымының екінші сессиясында.

Бұған дейін Алматы қаласында ғимараттарға сейсмикалық аудит жүргізілетінінін айтқан қала басшысы Е.Досаев әрбір үйдің кіреберісіне жер сілкінісі орын алғанда адамдардың эвакуацияланатын орынның картасы ілінетінін айтқан болатын.

JQ-Aqparat