Алматы облысында жолда көкпар ойнаған азамат жазаланды

Алматы облысының Еңбекшіқазақ ауданының №2 сотында ҚР Әкімшілік құқық бұзушылық туралы кодексінің 434-бабының 1-бөлігі бойынша Е.-ге қатысты іс қаралды. Бұл туралы inform.kz хабарлады.

Сот мәліметіне сәйкес, биыл 22 наурыз күні сағат 16:20-да айыпталушы Тауқаратұрық ауылында жүріп, Үлкен Алматы каналы тасжолында көкпар ойнаған. Осылайша, ол азаматтардың қоғамдық тәртібі мен тыныштығын бұзған.

Сот отырысында Е. кінәсін мойындап, құқық бұзушылық фактісін растады, қатаң жазаламауды сұрады.

— Қазақстан Республикасының Әкімшілік құқық бұзушылық туралы кодексінің 434-бабының 1-бөлігімен Е. кінәлі деп танылып, оған осы бап бойынша 20 АЕК айыппұл салынды, — деп хабарлады Еңбекшіқазақ ауданының № 2 аудандық сотының баспасөз қызметі.

Қаулы заңды күшіне енген жоқ.

 Фото: Видеодан алынған кадр