Алматы облысында жеңіл рельсті транспорт жүйесі салынады

Түрік компаниясының өкілдері Алматы облысында ұзындығы 150 шақырым болатын жеңіл рельсті транспорт жүйесін салуды жоспарлап отыр. Әкімдік тиісті меморандумға қол қойды. Алматы облысы әкімдігінің баспасөз қызметінің мәліметінше, түріктің «Ташяпы» компаниясы шілдеде жобаның техникалық-экономикалық негіздемесін әзірлеуге кіріседі.
«Ташяпы» компаниясы Қаскелең – Есік – Талғар – Алматы – Ұзынағаш бағыттары бойынша жеңіл рельсті тарнспорт жүйесін дамытуды жоспарлап отыр. Халық тығыз қоныстанған Талғар және Қаскелең қалаларында ЖРТ жанында арнайы тұрақ болады. Тұрғындар көліктерін сол тұраққа қойып, ары қарай ЖРТ-мен Алматыға қатынайды.
Әкімдік өкілдерінің сөзінше, бұл өз кезегінде қала мен оның маңындағы аудандарда кептелісті азайтады. Облыстың 300 мың адамы күніне Алматыға кіріп шығатынын ескерсек, қалаға жүктеме азаятыны сөзсіз.
ЖРТ ұзындығы 80 шақырым болмақ. Алматы мен Қонаев арасындағы жолды қосқанда 150 шақырымды құрамақ. Ал құрылыстың 1 кезеңі Талғар – Алматы арасында ЖРТ салудан басталады. Қонаев – Алматы жобасы 2-кезекте қаралады.

JQ-Aqparat