Алматы облысына дизель отынының қосымша көлемі жіберіледі

Энергетика министрлігі «ҚазМұнайГаз» ҰК» АҚ, «Petrosun» АҚ, АЖҚС ірі желілері («Helios», «Газпромнефть-Қазақстан», «PetroRetail» және «Sinooil») өкілдерінің қатысуымен Алматы облысын жанар-жағармаймен іркіліссіз қамтамасыз ету мәселелері бойынша кеңес өткізді.

Энергетика министрлігінің баспасөз қызметі хабарлағандай, 7 сәуірдегі жағдай бойынша Алматы облысы бойынша дизель отынының қоры 11 мың тоннадан асады. АЖҚС желілерінің өкілдері атап өткендей, оларда бар дизель отынының қоры халықты іркіліссіз қамтамасыз ету үшін жеткілікті.

АЖҚС желілерінің ақпараты бойынша дизель отынына сұраныстың артуы байқалады (30 пайыздан астам). Соның салдарынан кейбір жанармай құю бекеттерінде отынның тәуліктік көлемі тез таусылып қалады. Шымкент МӨЗ жөндеуге тоқтауына байланысты өңірге мұнай өнімдерін жеткізу бойынша шектеулер болды.

Сондықтан желілер басшылығы отынды көп тұтынатын аудандарға тиеп-жөнелтуді арттыру туралы шешім қабылдады.

Атырау МӨЗ және Павлодар МГХЗ-дан 5000 тонна отын жолда бара жатыр.

Өз кезегінде ҚТЖ ЖЖМ-ды уақтылы тасымалдауды қамтамасыз етеді.

7 сәуірде Шымкент МӨЗ-де жөндеу жұмыстары мерзімінен бұрын аяқталып, мұнай өнімдері өндіріле бастады. Өнімнің бірінші партиясы демалыс күндері жөнелтіледі деп жоспарлануда. Осы орайда Алматы облысын қоса алғанда, оңтүстік өңірлерге бірінші кезекте жөнелту қамтамасыз етіледі.

Алматы облысының ауыл шаруашылығы тауарын өндірушілеріне қосымша 3 мың тонна дизель отыны бөлінетін болады.

JQ-Aqparat