Алматы: мектеп пен балабақшаның бәрі қауіпсіздік жүйесімен қамтамасыз етілді

Алматы әкімі Ерболат Досаевтың тапсырмасымен білім беру мекемелерінде «Кешенді қауіпсіздік жүйесі» жобасы жүзеге асырылды.

Мектептер, балабақшалар, колледждер мен мектептен тыс мекемелер толығымен күзетпен және заманауи қауіпсіздік жүйесімен қамтамасыз етілген.

Оған тәулік бойы күзет, дабыл түймелері, бет-әлпетті тану мүмкіндігі бар турникеттер, бейнебақылау және өртке қарсы қауіпсіздік жүйесі кіреді. Барлық нысан балалар мен қызметкерлердің қауіпсіздігін арттыру үшін заманауи құрылғылармен жабдықталған.
Бейнебақылау аумақты бақылауға мүмкіндік береді, ал материалдар 30 күн сақталады.

Бейнекамерадан сигнал полиция департаментінің жедел орталығына түседі. Оқиға немесе төтенше жағдай болған жағдайда жедел топ келеді.
Мектептер мен балабақшаларды күрделі жөндеу жұмыстары аяқталған соң қауіпсіздік жүйелерімен қайта жарақтандыру жоспарланған.

JQ-Aqparat

Сурет: Алматы әкімінің баспасөз қызметі