Алматы: 400-ге жуық балалар мен спорт алаңдары жаңғыртылды

Алматыда «Халық қатысатын бюджет» жобасы аясында бір жылда 397 балалар мен спорт алаңы абаттандырылды.
Жаңа нысандардың ең көбі — Алмалы ауданында (91). Медеу ауданында — 80, Жетісу ауданында — 56.
Тұрғын саны көбейіп келе жатқан Алатау ауданында 45 жаңа спорт алаңы салынды, көпірге жөндеу жүргізілді және 1135 жарық нүктесі жаңғыртылды. Өткен жылы мұнда «Халық қатысатын бюджет» жобасы аясында 54 жоба жүзеге асырылды.
Тұрғындардың өтінішімен Зерделі шағын ауданында «Сирень бағы», Аханов көшесіндегі сквер, Сайын көшесіндегі бақылау алаңы абаттандырылып, Қарасу шағын ауданындағы сквердің құрылысы басталды. Аллеялар мен скверлерді абаттандырумен қатар кей жерлерде шамдар ауыстырылып, Үлкен Алматы арнасындағы көпір жөнделді.
Айта кетейік, «Халық қатысатын бюджет» — қала тұрғындары әкімдіктермен бірлесіп жергілікті бюджет қаражатын бөлісетін жоба. Тұрғындар өздері абаттандыру идеясын ұсынады. Оларды жоба деңгейіне дейін пысықтайды, содан кейін онлайн дауыс беру арқылы жеңімпаздарды таңдайды.

JQ-Aqparat