«Алимент көбеюі керек»

Кейбір азаматтар алимент төлеуге мүмкіндігі бола тұрып, баласын асыраушыға алимент аударудан әдейі жалтарады, табысы мен мүлкін жасырады. Орталық коммуникациялар қызметінде өткен брифингте Республикалық жеке сот орындаушылар палатасының төрағасы Айдос Иманбаев осылай деді. «Кейбір борышкерлер нақты қаржылық мүмкіндіктері бола тұрып, балаларын асыраудан әдейі жалтарады, табысы мен мүлкін жасырады. Бүгінгі таңда алименттің мөлшері борышкердің табысына байланысты белгіленеді. Бұл теріс пиғылды борышкерлерге табыстарын жасанды түрде азайтып көрсетуге жол береді. Әдетте, бұл борышкерлердің көпшілігі жеке кәсіпкер ретінде ресми тіркеліп, өздеріне ең төменгі жалақы 70 000 теңге белгілейді. Әділет министрлігі мүдделі мемлекеттік органдармен бірлесіп, борышкерлердің жасырын табысын, яғни такси қосымшалары, курьерлік қызметте жұмыс істейтін адамдардың табысын анықтау мәселелерін пысықтауда», — деді Айдос Иманбаев. Балалардың құқығын қорғау жөніндегі уәкілетті орган белсенділері алимент мөлшерін қайта қарап өсіру жөніндегі ұсынысты көтермек.

JQ-Aqparat