Әлихан Смайылов Премьер-Министр қызметіне тағайындалды

Мәжілістің сегізінші шақырылымына сайланған депутаттар Премьер-Министр лауазымына Әлихан Асханұлы Смайыловты қайта тағайындауға келісім берді. Мәжіліс депутаттары Үкімет басшысы кандидатурасын талқылағаннан кейін «Қазақстан Республикасының Президентіне Қазақстан Республикасы Премьер-Министрі лауазымына Смайылов Әлихан Асханұлын тағайындауға келісім берілсін» деген қаулы жобасына дауыс берді. Дауыс беруге қатысқан 97 депутаттың 82-сі Ә.Смайыловтың кандидатурасын қолдады. 7 депутат қарсы шығып, 8 депутат қалыс қалды.
Президент Қасым-Жомарт Тоқаев Әлихан Смайыловты Қазақстан Республикасының Премьер-Министрі лауазымына тағайындау туралы Жарлыққа қол қойды. Кеше сегізінші сайланған Парламенттің бірінші сессиясында сөйлеген сөзінде Мемлекет басшысы Премьер-Министр лауазымына кандидатты «AMANAT» партиясы ұсынатынын айтқан болатын.
Мәжілістің пленарлық отырысында Мемлекет басшысы Қасым-Жомарт Тоқаев Премьер-Министр лауазымына Әлихан Смайыловты тағайындау үшін депутаттардың келісім беруін сұрады.

JQ-Aqparat