Әлихан Смайылов: Қабылданған шешімдер ұйымның дамуына тың серпін береді

Бішкекте Премьер-Министр Әлихан Смайыловтың қатысуымен Еуразиялық үкіметаралық кеңестің шағын құрамдағы отырысы өтті.
Үкімет басшысының баспасөз қызметі жазғандац,  ЕАЭО шеңберіндегі орта мерзімді кезеңге арналған бірлескен іс-қимылдардың негізгі міндеттері мен басым бағыттары, энергетика саласындағы ынтымақтастық мәселелері, сондай-ақ өнеркәсіптің түрлі саласындағы кооперациялық жобаларды іріктеу тәсілдері және басқа да мәселелер талқыланды.

«Бүгін біз Комиссия дайындаған бірқатар баяндамаларды тыңдаймыз, елдеріміз үшін маңызды мәселелерді талқылаймыз, сондай-ақ ынтымақтастықтың алдағы уақыттағы бағыт-бағдарын айқындаймыз. Қабылданған шешімдер біздің ұйымның одан әрі дамуына елеулі үлес қосып, жаңа серпін беретініне сенімдімін», — деді отырыста сөз алған Әлихан Смайылов.

Іс-шараға Беларус Үкіметінің басшысы – Роман Головченко, Қырғызстан Министрлер кабинетінің төрағасы – Ақылбек Жапаров, Ресей Үкіметінің төрағасы Михаил Мишустин және Армения вице-премьері Мгер Григорян қатысты.

JQ-Aqparat

Суреттер: Премьер-Министрдің баспасөз қызметі