Әлихан Смайылов: Азаматтар жаңа төлемдерді уақытында алуы керек

Шілдеден бастап бірқатар төлемдер халыққа уақытылы төленуі керек. Бұл туралы Үкімет отырысында Премьер-Министр Әлихан Смайылов айтты.
«Жоғарыда айтылғандай, 1 шілдеден бастап бірқатар төлемдерді ұлғайту көзделіп отыр. Еңбек министрлігі Әлеуметтік кодекске сәйкес жәрдемақыны арттыруды, олардың уақытылы әрі толық көлемде тағайындалуын қамтамасыз етуі қажет. Азаматтар жаңа төлемдерді уақытында алуы керек», — деді Әлихан Смайылов.
Премьер-Министрдің атап өтуінше, әлеуметтік қолдау шараларын нақтылау үшін бірқатар нормативтік құқықтық актілерді қабылдау қажет.
Қазіргі уақытта Үкіметтің 26 қаулысының 10-ы қабылданды.
Еңбек министрлігі бұл жұмысты қысқа мерзімде аяқтап, бүкіл қажетті қаулы жобаларын Үкіметтің бекітуіне енгізуі тиіс.
«Еңбек министрлігі әкімдіктермен және Ақпарат министрлігімен бірлесіп, жаңа Әлеуметтік кодекстің ережелері туралы ауқымды ақпараттық-түсіндіру жұмыстарын жүргізуі керек», — деді ол.

JQ-Aqparat