Әлихан Смайылов: «АрселорМиттал Теміртауды» Қазақстан пайдасына беру рәсімі аяқталуға жақын

Үкімет отырысында Әлихан Смайылов Мемлекет басшысы Костенко шахтасында кеншілерлің қаза болуына байланысты тергеу жұмыстарын жүргізіп, «АрселорМиттал Теміртау» компаниясымен инвестициялық ынтымақтастықты тоқтатуды тапсырғанын атап өтті.
«Биыл тамыз айында да «АрселорМиттал Теміртауда» осындай оқиға орын алды. Ол кезде 5 шахтер қаза тапты. Көп адамның өліміне әкеп соққан апат өндірістегі қауіпсіздік талаптарының сақталмауымен тікелей байланысты. Бұл – бірінші кезекте кәсіпорын басшылығының кінәсі.
Компания өз міндеттемелерін орындаған жоқ. Қазіргі таңда, «АрселорМиттал Теміртау» компаниясын Қазақстанның пайдасына беру рәсімдері аяқталу сатысында. Комиссия апаттың себептерін жан-жақты тексеріп, оған кінәлі адамдарды анықтау жұмыстарын жалғастырады», — деді
Сондай-ақ ол Қарағанды облысының әкімдігі мен Төтенше жағдайлар министрлігі апатты жоюға күш салу керектігін айтты.
«Ең бастысы – қаза тапқандардың отбасыларына барлық көмекті көрсетіп, зардап шеккендердің денсаулықтарын қалпына келтіру. Осындай қиын жағдайда ешкім де назардан тыс қалмайды», — деді Әлихан Смайылов.

JQ-Aqparat