Алаяқ танымал дәрігердің атын жамылып, жарнама жасаған

Соңғы бірнеше айдан бері интернетте Қазақстанда аты танымал дәрігерлердің жалған сұхбаттары жарияланып жүр. Алаяқтар фейк парақшалар арқылы түрлі дәрі-дәрмектер сатып келген.  Бірнеше күн бұрын Қазақстанның Еңбер ері, алыс-жақын шетелге есімі белгілі кардиохирург Юрий Пя сондай «сұхбаттың» кейіпкеріне айналды. Жалған сұхбатта кардиохирург гипертониядан емделуге болатын дәрінің атын атады деп айтылған. Ұлттық ғылыми кардиохирургия орталығының баспасөз қызметіне хабарласқанымызда, қызметкерлер ол ақпаратты жоққа шығарды.  ҚазАқпарат хабарлағандай, орталық төрағасы Юрий Пя ешқандай жарнамаға түспеген, ешкімге сұхбат бермеген. Баспасөз қызметінен хабарлағандай, орталық қызметкерлері бір жылдан бері осындай фейк парақшалармен күресіп келеді екен. «Біз полицияға арыз түсірдік. Мәселенің мән-жайын полиция анықтап жатыр. Орталықтың заңгерлері мәселені қадағалап отыр. Яғни, бір күн ғана жұмыс істейтін сайттар ашылады да танымал адамдардың атын жамылып, жарнама береді. Осыған дейін біздің кардиолог Махаббат Бекбосынова, нейрохирург Серік Ақшолақов пен бірнеше алматылық дәрігердің атын жамылған жарнамаларды көрдік»,-дейді маркетинг және бизнесті дамыту бөлімінің басшысы Әсел Мәжібаева. Әселдің айтуынша, фейк парақшалар көбіне емдік қасиеті бар білезіктерді, таблеткалар мен шәрбаттарды жарнамалаған. «Бағасы удай бұндай заттарды сатып алып, алаяқтарға алданған адамдар бізге хабарласып жатады»,-дейді ол. Бұндай жарнамалармен қалай күресуге болатындығын анықтау үшін «ҚазАқпарат» агенттігі Ішкі істер министрлігіне ресми сауал жолдады.