Ақтөбе: Мектеп есепшісі 238 млн теңге жымқырған

Ақтөбеде мектеп есепшісі 238 млн теңге бюджет қаражатын қалтасына басқан. Бас прокуратураның баспасөз қызметі мәлімдегендей, Ақтөбе облысы прокуратурасының арнайы прокурорлары №48 жалпы білім беретін мектеп есепшісінің бюджет қаражатын заңсыз иемдену дерегін анықтады.
Есепші Г 2019-2024 жылдар аралығында қызмет бабын пайдалана отырып, мектеп қажеттіліктеріне бөлінген 230 млн теңгеден астам бюджет қаражатын иемденген.
Иемденіп алу схемалары жалақыны белгіленген нормадан тыс аудару, қос демалыс беру арқылы жүзеге асырылған.
Есепші Г.-ның іс-әрекеті ҚК-нің 189-бабының 4-бөлігінің 2-тармағымен (аса ірі мөлшерде cенiп тапсырылған бөтен мүлiктi иемденiп алу немесе талан-таражға салу) сараланды. Арнайы прокурорлармен қылмыстық іс мәні бойынша қарау үшін, Ақтөбе қаласының №2 сотына жолданды. Сот шешімімен есепші Г. кінәлі деп танылып, 6 жылға сотталды.

JQ-Aqparat