Абайлаңыз, ел ішін «Омикрон» кезіп жүр

Jas Qazaq денсаулық сақтау министрлігінен коронавирустық инфекцияның қазіргі эпидемиологиялық ахуалы туралы ақпарат сұратты.

Министрліктің хабарлауынша, жыл басынан бері елде 2055 адам коронавируспен ауырған.  Бұл көрсеткіш өткен жылмен салыстырғанда сырқаттанушылықтың 6 есеге төмендегенін көрсеткен.
Эпидемиологтар республикада SARS-Cov-2 вирусының генетикалық зерттеулерін үздіксіз жүргізіп жатыр дейді министрлік. Соңғы деректер бойынша, ел аумағында «Омикрон» штамының нұсқалары айналымда жүр. Көп жағдайда ауру жеңіл түрде өтетін көрінеді.
Сонымен бірге, елде ЖРВИ мен тұмаудың маусымдық өсуі байқалады. ЖРВИ-нің 246 343 жағдайы және тұмаудың зертханалық расталған 397 оқиғасы тіркелген.
Министрліктің мәліметінше, COVID-19-ға қарсы вакцина егу уақытша тоқтатылған. Бұған халық арасында ұжымдық иммунитеттің қалыптасуы және вакцинаға сұраныстың төмендеуі себеп болып отыр. Болашақта вакцинациялау туралы шешім эпидемиологиялық жағдайға байланысты қабылданады.
Эпидемиологтар тұмау және ЖРВИ таралуының алдын алу үшін сақтық шараларын күшейтуге шақырады. Атап айтқанда, адамдар көп жиналатын жерлерде маска тағып, гигиеналық ережелерді сақтау маңызды.

Олжас Әбдіхалық

Сурет: gov.kz