Ақжарқынға сот үкімі ақпанның соңында шығады

Қытайда есірткі саудасымен айналысты деп айыпталған қазақстандық Ақжарқын Тұрлыбайдың ісі бойынша сот үкімінің қашан шығатыны белгілі болды.

Baq.kz хабарлағандай, «бұған дейін сот отырысы 27 немесе 28 ақпанға белгіленген болатын. Осы уақытта өтуі керек», — деді қыздың адвокаты Сұңқар Нұрмағамбетов.

Еске сала кетейік, қазақстандық 20 жастағы студент Ақжарқын Тұрлыбай 2014 жылдың наурызында Қытай мен Малайзияның шекарасында ұсталған болатын. Оның жүгінен 4,5 келі есірткі табылды. Қыз сөмкесінде есірткінің барын білмегенін, оны біреулердің беріп жібергенін айтты. Кейін Қытай соты оған өмір бойына бас бостандығынан айыру жазасын кесті.