Жалақысын ала алмаған жігіт қарнын тіліп тастады (видео)

Алматыда құрылыс компаниясына алданған жігіт қарынын өткір затпен тіліп тастады. Айтуынша, құрылыс жүргізіп жатқан қосалқы мердігер компания үш айдан бері жалақыларын бермеген. Қазір «ТурҚазконстракшн» компаниясынан 37 құрылысшы айлығын даулап жүр. Бірақ, зардап шеккендердің айтуынша, компания басшысы бой тасалап, Түркияға кетіп қалған көрінеді. Бұл туралы КТК телеарнасы хабарлады.

Компанияның директорына да айтқым келді, ешкім жолатпайды. Ой, өйтіңдер, бүйтіңдер дейді. Өзі сөз бергенімен, артынан басқаша сөйлейді. Ойын бәрі.

Бейне жазбада адал ақысы мен маңдай терін даулаған жігіттің жанайқайы мына қоршаудың әр жағынан ғана естіледі. Себебі, құрылыс нысанына аттап басу мүмкін емес. Күзетшілер де мардымды жауап қатпады. Шарасыздықтан қарнын тілген жігіттің жағдайын тек телефон арқылы біліп отырдық

Айдың күннің аманында өзін-өзі қан-жоса еткен Бауыржан Шобаевтың еңбек ақысын алмағынына үш айдың жүзі болыпты. Екі бригадаға біріккен 37 жігіттің де көрген күні осы. Барлығы қосалқы мердігер «ТурҚазконстракшн» компаниясында қызмет істеген. Бірақ, жаз бойы төгілген тердің өтеуіне қара бақыр татырмапты. Тағы бір құрылысшы Ниет Ескендіровтің айтуынша, амалы таусылғандықтан өлімге бас тіккендердің алды-арты бұл ғана емес екен.

Ниет Ескендіров, құрылысшы:

-Сондайға барғаны өте өкінішті. Бала-шағасы бар бәрінің, ақша алмағасын сондайға барып отыр. Тек ол ғана емес, осыдан екі апта бұрын өзін өлтірмек болған, құдай сақтап аман алып қалдық.

Ал, қарыны тілінген Бауыржанның халі нашарлаған соң қасындағылар жедел жәрдем шақырып, ауруханаға жеткізілген. Дегенмен, ашынған жігіт сағымға айналған айлықтан бөлек құрылыс барысындағы өзге де былықтарды жайып салды.

Бауыржан Шобаев, құрылысшы:

-Кейбіреулер условия қойып отырады. Аптасына, немесе айына 150-200 тың теге беріп отырамыз, біз тексермейміз дейді. Ертең өздерінің ұрпақтарын жер сілкініп, мына үй басатын болса көретін едік. Безпредел, ешкімнің жаны ашып тексеріп отырған жоқ. Жаны ашымайды.

Құрылыстан нәпақасын айырғандардың айтуынша, «ТурҚазконстракшн» компаниясы оларға 7 миллион теңгеден астам ақша қарыз. Қолдарында мөрі басылған келісім-шарттары да бар. Бірақ, сөзбұйдаға салып келген компания басшысы бой тасалап, Түркияға тайып тұрыпты.

Ниет Ескендіров, құрылысшы:

— Күні ертесіне компаниясының басшысын еш жерден тапқан жоқпыз. Тіпті, әуежайға дейін шығатын шығар деп, екі сағат сайын күттік. Кейін естідік, Бішкектен шығып кетіпті деп.

Суға кеткен тал қармайдының кебін кигендер бас мердігер компанияның да есігін қаққан. Алайда, қосалқы мердігердің алдында қарызымыз жоқ деген олар, сылап-сипап шығарып салыпты. Ал, құрылысшылар болса, қолға тимеген жалақының кесірінен әлдекім өзін-өзі жазым ете ме деп қауіптенеді.