Ауыл шаруашылығы кооперативтерін қолдауға 52 миллиард теңге бөлінген

Ауыл шаруашылығы кооперативін қолдауға 52 миллиард теңге бөлінген

Премьер-Министр Бақытжан Сағынтаевтың төрағалығымен селекторлық режимде үкіметтің кезекті отырысы өтті. Күн тәртібіндегі «АӨК дамытудың мемлекеттік бағдарламасын іске асыру» жайы бойынша ауыл шаруашылығының бірінші вице-министрi Қайрат Айтуғанов баяндама жасады. Бұл туралы jasqazaq.kz тілшісі хабарлады.

«Ағымдағы жылы ауыл шаруашылығы кооперативтерін қолдау мақсатында 52 миллиард теңге, яғни Ауыл шаруашылығын қаржылай қолдау қоры арқылы – 25 миллиард теңге және Нәтижелі жұмыспен қамту және кәсіпкерлікті дамыту бағдарламасы негізінде 27 миллиард теңге бөлінді», — дейді вице-министр. Сондай-ақ тыңайтқыштарды қолдануға қатысты, элиталы тұқымдар мен мал шаруашылығы саласын субсидиялау механизмдерінде өзгерістер болатындығына байланысты әрқайсысына жеке-жеке тоқталды.

Қайрат Қапарұлының айтуынша, биылдан бастап отандық өндіріске бағытталған техника мен құрал-жабдықтарды субсидиялаудың әдістемесі өзгереді. «Айталық, бұған дейін шетелдік астық жинаушы бір комбайнға 30 миллион теңге берілсе, биылдан бастап бұл қаражатқа 3 астық жинаушы комбайн субсидияланады. Шетел техникасы да әдеттегіше субсидиялана береді. Алайда, олардың бағасының тым қымбат болуына байланысты қаржыландырылуы 5-7 пайыз деңгейінде болмақ. Ал отандық техника үшін 25 процент көмек берілмек», — деді Қайрат Айтуғанов.