Нұртас Айдарбеков: Тойға шықсам, Қайрат ыңғайсызданады

Бүгінде феномен әншіге айналған Қайрат Нұртастың әкесі де өнер әлемінде жүр. Ұлын жұлдыз еткен Гүлзира Айдарбекова енді күйеуінің әншілік мансабын бір жолға қоюды армандайды. Алайда Нұртас Айдарбековтің өзі баласымен жарысып ән айтқанға аздап ыңғайсызданатын көрінеді.

31 арнаның «Айта берсін» бағдарламасына берген сұхбатында Нұртас Айдарбеков шығармашылықтағы жаңалықтарымен бөлісті.

«Сиви қарындасым мен Ренаттың «Соқыр махаббатына», оның алдында Қайраттың «Өкінішіне» түстім. Жалпы мен отбасымда тоғызыншы, кенже баламын. Ағаларымның бәрі Алматыдағы консерваторияны бітірген. Мен үйде ең соңғы баламын, ата-анам тек маған ғана рұқсат бермеді. Сондықтан мен бұл жолды мамандық ретінде таңдаған жоқпын. Ал жалпы отбасымызда өнер барлығында бар», – дейді Қайраттың әкесі.

Гүлзира Айдарбекова күйеуін танымал әнші еткісі келетінін айтқан еді. Бұған Нұртас Айдарбековтің өзі не дер екен?

«Маған Гүлзира ешқандай продюсерлік жасамайды. Айтсам, өзім анда-санда әнімді айта жүрермін. Біз жалпы бір отбасымыз ғой, продюсерлік деген жоқ», – деп түсіндірді Нұртас Айдарбеков.

Феномен әншінің әкесі тойға да шығып тұратынын жасырмады. Алайда ол ұсыныстардың басым бөлігінен бас тартатынын айтты. Себебі әкесінің тойда ән салғанын Қайрат ұнатпайтын көрінеді. Айтпақшы, Нұртас Айдарбеков тойдан ұлынан қарағанда үш есе аз табыс табатынын ашып айтты.

«Тойға барамын, бірақ көбінесе өзім тартыншақтап, бас тартуға тырысамын. Өйткені Қайрат та ыңғайсызданып жатады кейде. Ал енді қалай да келуіңіз керек деген жерлерге барамын. Мәселе ақшаға тіреліп тұрған ештеңе жоқ. Бірақ бойыңда кішкене өнер жатқаннан кейін, соны шығарғың келіп тұра ма? Қарап отырсаңыз, қартайып қалған да ештеңем жоқ сияқты. Дегенмен біздің қазақы менталитетке бір жағы келмейтін сияқты ма? Енді білмеймін, ештеңе айта алмаймын», – дейді Қайрат Нұртастың әкесі.

stan.kz