Түрмеге есірткіні сарымайға салып кіргізбек болған

Тараз қаласында орналасқан жалпы режимдегі ЖД-158/2 түзеу мекемесінде күшті әсер ететін есірткі затын өткізбек болған әрекеттің жолы кесілді.

BNews.kz хабарлағандай, «осы жылы күшті әсер ететін есірткі заты бірінші рет тәркіленіп отыр. Сотталған жолдасымен кездесуге келген әйел адамның азық-түлік заттарының ішінде «Шедрое лето» сарымайына қызметкерлер ерекше назар аударған. Әдеттегідей тәртіп сақшыларының қырағылығының арқасында тамақ өнімінің ішінен 5 кішкентай түйіншек табылды. Сот-химиялық сараптама алынған заттың героин екенін анықтады», — дейді аталған өңірдің қылмыстық-атқару жүйесі комитетінің баспасөз-қызметі.

Осыған ұқсас жағдай Шығыс Қазақстан облысында да орын алған. Сотталғанға келген заттарды тінту барысында рентген аппараты арқылы ОВ-156/18 мекемесінің қызметкерлері сабын, шай, темекі заттарының ішінен целлофан қалтасына оралған есірткі заттарын тапты.

Аталған фактілер СДТБР-не тіркеліп, қылмыстық іс қозғалды, сотқа дейінгі тергеу шаралары басталды.