Әсет Мағауов: Бензиннің қымбаттауы көліктің көптігінен

Бензиннің қымбаттауы көліктер санының артуымен байланысты. Бұл туралы ҚР Энергетика министрлігінің өкілдері мәлімдеп отыр.

Tengrinews.kz хабарлағандай, «біріншіден, Қазақстанда мұнай өнімдерін пайдалану артты. Бұл көлік санының артуымен байланысты болып отыр. Егер 2001 жылы 1 миллион 58 мың көлік тіркелсе, 2016 жылы бұл көрсеткіш 3 миллион 924 мыңға жетті. Сәйкесінше жанармай пайдалану 2,5 есеге артып отыр», — дейді вице-министр Әсет Мағауов ОКҚ-дағы брифинг барысында.

Елімізде бензин өндіру 1 миллион 536 тоннаға, ал дизель отынын өндіру 2 миллион 900 тонаға артқан.

«Өндіру көлемін арттыру импортқа тәуелділіктен құтқармайды. Қазір біз бензиннің 30 пайызы мен дизель отынының 15 пайызын Ресей Федерациясынан жеткіземіз», –  дейді Ә.Мағауов.