Ә.Смайылов: «Ата-ана баласының қауіпсіздігіне алаңдамауы тиіс»

Баласын мектепке жіберген ата-ана оның қауіпсіздігі мен бас амандығына алаңдамауы қажет. Үкімет отырысында Премьер-министр Әлихан Смайылов осылай деді.

«Балалардың қауіпсіздігін қамтамасыз ету мәселесі – мемлекеттің аса маңызды міндеттерінің бірі. Ата-ана мектептегі баласының жағдайы мен қауіпсіздігі үшін алаңдамауы қажет. Бұл бағытта нормативтік те, ұйымдастыру жағынан да барлық деңгейде жүйелі шаралар қабылдануда. Мемлекет басшысының тапсырмасына сәйкес Балаларды қорғау жөніндегі кешенді жоспардың жобасы әзірленді. Білім беру ұйымдарын дабыл кнопкаларымен және бейнебақылау жүйелерімен жабдықтауға, оларды полиция бөлімшелеріне қосуға, лицензияланған күзетпен қамтамасыз етуге қойылатын талаптар күшейтілді. Атқарылған шараларға қарамастан, өңірлерде проблемалар әлі де жеткілікті. Бейнебақылау орнатылған мектептердің арасында камералары стандарттар мен техникалық талаптарға сәйкес келмейтін мектептер де бар. Еліміздегі 1100-ге жуық мектеп полицияның жедел басқару орталықтарына қосылмаған. Бақылау режимі қатаң сақталмайды», – деді Үкімет басшысы. Мектеп тыныштығын күзететін қарауылдарды жұмысқа алғанда арнайы дайындықтан өтпеген адамдардың қабылданып кететініне де қынжылыс білдірді. Бұл мәселені де оңынан шешу балалардың қауіпсіздігі үшін қажет екендігін ескертті.

JQ-Aqparat