Семейдe тасжолдан сырт киімі жоқ бала табылды

30 қараша 2020, 16:23

Шығыс Қазақстан облысының Семей қаласында трассадан жасөспірім бала табылды.

Семей қалалық Полиция басқармасы баспасөз қызметінің мәліметіне сүйенсек, 28 қарашада сағат 16.28-де «102» арнасына қоңырау шалған тұрғын Қарағайлы көшесінде орналасқан жаңа спорт кешені маңындағы тасжолдың бойында сырт киімсіз кетіп бара жатқан жасы 12-лер шамасындағы бала туралы айтқан. Анықталғандай, жеткіншек церебралды сал ауруымен ауырады. Анасы үй жинап жүрген кезде ол сыртқа шығып кеткен. Семей қалалық Полиция басқармасы бастығының міндетін уақытша атқарушы Жандарбек Ахметжанов баланы байқап қалып, немқұрайлық танытпай полиция хабар бергені үшін В.Дубербаеваға алғыс білдірді. «Біздің қоғамда осындай жандардың бар екендігі қуантады. Балалар – біздің болашағымыз. Сол күні осы жеткіншектің маңынан қанша көлік өтсе де, ешкім тоқтамаған. Ал В.Дубербаева адамгершілік танытып, оған көмектескісі келді», — деді полиция подполковнигі Ж.Ахметжанов.

ktk.kz