Шыңжанда коронавирус жұқтырғандар саны артуда

Қытайдың Шыңжан-Ұйғыр автономиялық өлкесінде COVID-19 жаңа коронавирусын жұқтырғандар саны 115-ке жетті. Бұл туралы жергілікті денсаулық сақтау комитетіне сілтеме жасап ҚазАқпарат хабарлайды.

«Өткен тәулікте өлкеде Шыңжан өндірістік-құрылыс корпусын қосқанда (ШӨҚК) 20 коронавирус жұқтыру оқиғасы тіркелді. Жалпы 2020 жылдың 24 шілдесі 24.00-дегі мәлімет бойынша, Шыңжанда 115 инфекцияға шалдығу оқиғасы (оның 113-і — Үрімжіде, біреуі — Қашқарда және тағы бірі — ШӨҚК-де), сонымен қатар 114 симптомсыз вирус тасылмалдаушылар анықталған (барлығы Үрімжіде). 7 мыңнан аса адам медицина қызметкерлерінің бақылауында» делінген комитеттің ақпарат бюллетенінде. Бұған дейін Үрімжі қаласының екі ауданы эпидемиялогиялық қауіп дәрежесі жоғары елдімекендер деп жарияланған. Еске сала кетсек, Шыңжанда COVID-19 вирусы тарай бастаған сәттен кейін 149 күн бойы коронавирус жұқтыру оқиғасы тіркелмеді. Шыңжан-Ұйғыр автономды ауданындағы ең алғашқы инфекцияға шалдығу оқиғасы 23 қаңтар күні анықталған.