Байбек жылдамдық режимі өзгеруіне қатысты пікір білдірді

Nur Otan партиясы төрағасының бірінші орынбасары, Алматының бұрынғы әкімі Бауыржан Байбек Әл-Фараби даңғылы, Саин көшесі және Шығыс айналма автокөлік жолындағы жылдамдық режимі өзгеруіне қатысты пікір білдірді.

Экс-әкім Tengrinews.kz тілшісімен Instagram желісіндеі сұхбаттасу кезінде әлеуметтік желілердегі талқылауларды көріп отырғанын айтады. «Менде Twitter және Instagram желілерінде парақшаларым бар, Facebook-ты да оқып отырамын. Кез келген мәселеге түрлі пікірлер айтылады. Әсіресе, ол мәселе адам өмірі мен денсаулығына қатысты болса. Сіздер Алматының адам өліміне әкелген жол-көлік оқиғасы саны жөнінен тек Қазақстан бойынша емес, әлем бойынша да көш бастап тұрғанын білесіздер ме? Бұл Алматының ғана емес, бүкіл Қазақстанның рейтингін түсіреді», — дейді Байбек. «Жылдамдықты азайту жол қауіпсіздігі тиімділігін арттыруға бағытталған басты алты қадамның бірі. Біз кез келген шешім қабылдаған кезде әлемдік тәжірибеге, заманауи трендтерге сүйенетінбіз. Қауіпсіздік — «Алматы 2020″ бағдарламасының басты бағыты. Швецияның тәжірибесіне сүйене отырып, Vision Zero жүйесін енгізе бастадық». «Nur Otan партиясына ауысқаныма екі ай уақыт болып қалды. Бүгінде Алматыны әріптесім Бақытжан Сағынтаев басқарып отыр. Шешімді қабылдайтын да сол, сол аумақ үшін жауап беретін де өзі. Қоғамдық кеңес бар, мәслихат бар. Мұнда қандай да бір ақыл-кеңес беру артық болар деп ойлаймын», — деді Бауыржан Байбек.