3 келіден аса есірткі сақтаған

Қызылордалық полицейлер 3 келіден аса есірткі затын сақтаған ер адамды ұстады. Бұл туралы  Қызылорда облыстық ІІД баспасөз қызметіне сілтеме жасай отырып Tengrinews.kz хабарлайды.

Облыс аумағында өткізіліп жатқан «Өрмек» жедел-профилактикалық іс-шарасы барысында Қызылорда ОІІД Есірткі бизнесіне қарсы күрес басқармасының қызметкерлері есірткі затын аса ірі көлемде сақтап жүрген қызылордалық 1974 жылғы тұрғынды анықтап, құрықтады.

«Сезіктінің үйіне тексеру жұмыстары жүргізіліп, нәтижесінде есірткі затын пайдалануға арналған құрал, ыдысқа салынған сора өсімдігінің тұқымы, газет қиындысына оралған жасыл түсті, өзіне тән ерекше иісі бар өсімдік тектес зат және есірткіге ұқсас заттек салынған сөмке анықталды. Аталған заттар заттай айғақ ретінде алынып, тиісті сараптама тағайындалды. Сараптама қорытындысы бойынша, зат салмағы 3 келі 425,17 грамм болатын «кептірілген марихуана» екендігі белгілі болды», — деп хабарлады баспасөз қызметіндегілер.

Қазіргі таңда аталған дерек бойынша Қазақстан Республикасы Қылмыстық кодексінің 296-бабы 4-бөлігімен қылмыстық іс қозғалып, сотқа дейінгі тергеп-тексеру амалдары жүргізілуде. Сезікті тұлға оқиға орнынан ұсталып, Қалалық ішкі істер басқармасының Уақытша ұстау абақтысына қамаққа алынды.