«Жау кеткен соң»: Алматыда көпқабатты үйлердің шатырын тексеру басталды

Кеше Алматыда тоғызқабатты үйдің шатырынан екі қыз бала құлаған болатын. Бүгін Алматы қаласы коммуналдық инфрақұрылымын дамыту басқармасы хабарлағандай, әкімдік биік ғимараттардың қауіпсіздігін қамтамасыз етуді талап ете бастады. Көп қабатты үйлердің басқарушылары шатырға шығатын терезе-есіктің бәрін жабуы тиіс.

Қазір жергілікті атқару органдарының қызметкерлері, басқарушы компаниялардың өкілдері белсенді тұрғындармен бірге үй-үйді аралап, іске кірісіпті.

Кеше оқыс оқиға болған үйдің тұрғындары «шатырға баратын жолды баяғыдан жабу керектігін айтқанбыз» деген. Бірақ ешкім құлақ аспаған көрінеді. Енді, міне, әдеттегідей «Жау кеткен соң қылышыңды тасқа шаптың» кері.

Еске түсірсек, былтыр хостел өртенгеннен кейін жаппай тексеру басталып кеткен. Қазір сол хостелдерді анда-санда да болса да аралай ма екен?

JQ-Aqparat